香港新浪網 MySinaBlog
« 上一篇 | 下一篇 »

朶花花係咪好靚呢!! 知唔知用咩做成呢? 下面話你知.

呢間綠楊邨食上海菜其實都幾老字號. 其中呢個花花菜色都幾出名.

學名叫宮廷富貴花. 其實係用片薄左既酸蘿蔔卷成花瓣,花芯就係紅椒,唔辣既,就係好巧功夫既一個頭盤. 蘿蔔味道冇過酸或過甜,而且十分爽脆,真係好開胃,好睇又好食!!! 記得要預訂架!!

綠楊丁香雞都係一個頭盤. 打黎訂位時接線生推介. 其實係去骨手撕咸雞配個汁醬. 老實食落係偏咸,不過肉就幾嫩. 但我就覺得個汁又冇特別味道,只係一個好普通既手撕雞,唔推介.

清炒河蝦仁係一道上海名菜. 不過唔係成日有靚既河蝦. 好似呢晚既河蝦又細隻,甜味亦一般. 收$230一碟其實都略為貴. 下次我就唔會點喇!

文思豆腐羹絕對係必點項目. 不過一定要預訂. 呢個湯底其實係好似魚翅既湯底咁,即係有雞同金華火腿煲既濃湯,極香金華火腿味. 一絲絲當然就係豆腐啦!! 唔似.....因為係師傅超勁既功力將豆腐切到頭髮咁幼. $60一碗絕對超值. 由湯底到刀功我認為唔止收呢個價.

鍋鎉帶子同鍋鎉豆腐做法一樣,先炸後煮. 帶子十分鮮甜,唔錯.

糟溜魚片係我好鍾意既上海菜. 因為呢度菜用酒糟煮,有酒香,又甜甜地,最重要個魚片係極之滑又冇骨. 真係好好好食!!!

蔥爆牛肉都好正路,份量夠,味道唔錯,牛肉有肉味亦唔算鞋,點左銀絲卷配呢個都好食! 

香煎走地雞係侍應推介,等左好耐既結果原來係咁. 香煎??? 完會唔係,似係鍋鎉做法. 而且個雞冇雞味,點都唔似係走地雞,呢個真係唔得!!!

生煎包個包好軟熟,包底十分脆,肉都幾鮮味,有水準!!

整體其實都ok既,係兩個雞菜式麻麻,其他都算唔錯. 仲有維港夜景睇,都幾好喇!!!

地址: 銅鑼灣告士打道280號世貿中心11樓

電話: 2881 6669