香港新浪網 MySinaBlog
« 上一篇 | 下一篇 »

呢個牛柳粒晚市起碼都要七八十蚊,但午市套餐紙有得揀架!!

份量好多,完全唔信佢係套餐內其中一個小菜.

今次就係想推介吓鴻星呢個咁抵既商務四人套餐. 睇落四人要$488加埋一咪都要百幾一個人好似有啲貴. 不過話你知,佢份量係絕夠五個成年人夠食,或者六個細食既女仕. 

今日老火靚湯係翅群湯. 材料十分足,夾起一梳梳翅群,仲有好多雞腳. 啖湯真係甜到不得了,又夠火喉,而且我地五人每人都可以有兩大碗!!! 其實每日都有唔同既老火湯,幾次都一樣咁好飲. 最記得有個粉葛鯪魚湯,真係極之鮮甜,好濃郁,夠火喉,真係好好飲!!

燒味可以揀拼盤或者炸子雞半隻. 上次食過雞都好食,但拼盤開心啲,有多幾款野食. 燒肉仲暖而且塊皮好脆架!!! 叉燒夠蜜味又夠腍. 雞都唔錯,肉幾嫩亦有雞味! 

小菜可以揀兩款,牛柳粒夠哂份量又腍又好食!! 有女仕當然都想食個菜啦! 呢個啫啫唐生菜好香蝦醬味,不過又唔會過咸,生菜仲爽脆,大家都好喜歡呢個,所以基本上每次都會點. 

其實仲有三款點心,不過大家太肚餓,我未影都已經開始夾黎食,叫都叫唔住!! 三款點心有蝦餃,燒賣同鴻星名物之一石頭魚餃. 三個點心都好食,雖然五個人要分每籠四粒好似唔夠,但其實有好幾個已經投降,食唔到,咁就幾個有食力既清埋佢.

最後仲有個蛋白瑤柱炒飯,有幾個都只係可以食到一啖仔. 個炒飯一啲都唔媽夫,炒得又香又乾身,材料都好足. 上次食仲要包走食唔哂. 所以呢個超值又好食既套餐一定要推介俾大家.  

地址: 旺角太子道西193號新世紀廣場6樓601號舖

電話: 2628 0890