香港新浪網 MySinaBlog
« 上一篇 | 下一篇 »
胃食妹ET | 23-May-13 | 自家製作~好味呀! | (464 Reads)

我本身好鍾意飲青豆蓉湯,又因為剛買左部攪拌機,所以又想自己整個飲吓.

呢個係咪完全唔似青豆湯呢!! 因為我放多左紅蘿蔔,所以個顏色偏紅左,少少橙色咁,都幾靚呀!! 哈哈!!

材料當然有青豆啦. 我用既都係急凍,半包. 只要用水沖吓都可以解凍,同埋煮多陣都已經腍哂,所以唔需要刻意解凍. 

紅蘿蔔一定要用有泥好粗好大條既先甜. 千萬唔好用甘筍,因為係唔夠甜. 我只係用左一大條就已經令煲湯變成橙色,哈哈!!! 其實應該落多少少青豆. 我煮野冇乜份量,都係試驗性質. 

洋蔥用左兩個. 其實洋蔥又係好甜架!!

煙肉兩片. 其實青豆湯既湯底一般都係用豬骨煲,不過我懶,又想有香味,所以自創用煙肉. 原來效果十分好!!!! 

白鑊唔使落油,加切粒煙肉慢火煎香,見鑊底有油就可以落洋蔥爆香,再加埋紅蘿蔔同青豆,炒香佢就可以加水煮一陣,之後水連料放落攪拌機攪爛.

當然要少少咁攪,睇下個樣太杰就加水去到你想要既杰度. 

繼續係咁打蓉哂之後,再落番煲再煲吓佢. 當你試味時你會好驚訝原來可以咁甜!! 只係加少少鹽就已經飲得. 本來青豆湯都會加少少忌廉,不過我自己唔太鍾意所以冇落.如果你喜歡加忌廉會香好多!! 簡單易做,又真係好好飲架!!