香港新浪網 MySinaBlog
« 上一篇 | 下一篇 »

突然其來既一個邀請,又咁橋位置時間都方便就去左香港仔試試!! 無錯,係香港仔,話遠就唔算太遠,我屋企都有直接車去,但係紅隧隧道口塞車就意料唔到會塞咁耐. 可能週末都係咁. 幸好冇遲到!! 嘻嘻!

呢個十分精緻既海南雞飯係特別做俾我地試下. 賣相十分唔錯!

呢度係L'Hotel內既LIS Cafe. 環境十分寬敞,人亦唔算太多,我自己就好鍾意.

用環保概念,連牆上裝修都係用真魚皮做架,好得意又好靚呀!!

我就第一時間睇睇個酒吧區啦! 地方唔算太大,但坐得舒服,最緊要酒既選擇都唔少!!

星期一至五中午有semi-buffet,星期六日就係full buffet. 食物都係貴精不貴多!

擺放空間好多,唔會迫迫夾,拎食物都拎得舒服! 要提提熱盤既白汁魚柳超級滑溜,好好食!!

refill都好快,唔會冇野食!

有即煮粥及意粉,海鮮配料夠誠意.

有兒童corner,可以俾小朋友啲佢地較喜歡既食物. 呢個idea唔錯!!! 讚!!

甜品選擇好多,而且唔係放係室外而放凍櫃內,又幾細心喎!

到我地食主菜喇! 今次酒店特別安排一個乜都有既菜單俾我地. 食西餐當然先有餐包,款式唔少.

香煎帶子沙律配黑松露香草蕃茄汁 - 用既係刺身帶子,所以唔煎太熟都可以食得,而且好鮮甜. 

帶子仲有杏仁脆片係面,睇得出師傅好細心.

法國海龍皇湯必備既醬同包. 

海龍皇湯都係用大量雜魚煲成. 除左煲得耐,隔渣都要唔少時間. 個湯極之濃郁,真係水準唔錯. 而且聽聞師傅係首批去法國學做呢個湯既廚師.

松茸菌西洋蒜焗澳洲銀雪魚柳 - 把刀一切落去已經知道個魚柳超級滑!! 食落果然不出所料,味道夠亦唔會搶左魚既油香味. 不過注意呢個份量係為我地而設. 正常應該大一倍.

星洲海南雞飯 - 西餐幾味又黎個東南亞菜. 師傅果然厲害!! 個雞滑到不得了,原來係浸熟既,難怪! 咁做既雞一定會好滑! 個雞油飯都唔錯,不過可以再油少少!! 唔健康先至好食!! 哈哈!!!

木糠布甸, 藍莓金寶香草雪糕 - 迷你木糠布甸好得意,又幾好食,一啖過. 藍莓金寶都好食,用新鮮生果做既味道最自然!!

整體食物水準十分唔錯,而且係細節都睇出師傅用心製作. 酒店出品可以係多國菜都做得好既的確唔多,呢間絕對推介!!!

  
地址 :  香港仔黃竹坑道55號如心南灣海景酒店P3
電話
: 3968 8833