香港新浪網 MySinaBlog
« 上一篇 | 下一篇 »

已經聽過南記好耐,今日終於黎試下呢間潮州老舖. 有時睇食評都要睇邊個寫,有時真係唔多信得過,最好都係自己親身去試. 呢間既食評都好一般,又話服務唔好等. 不過我就完全唔覺,食物好,服務都一樣好,伯伯好親切!!

如果午市一個人黎可以叫下炒粉麵. 我下次都會黎試呢啲!! 魷魚絲炒麵好吸引!!!

我地三個人叫個二人套餐. 每道菜都有兩款可揀. 我地當然要胡椒咸菜豬肚湯啦!! 胡椒味可以重少少,可能我食得辣啦! 火侯好夠,好夠味,亦都好正宗既胡椒咸菜豬肚湯!! 好好飲!

客家咸雞就聽得多,潮州咸雞都係第一次食. 都係咸咸地,好有雞味,而且皮下脂肪唔會過多,肉質醃咸左係結實少少,不過好咸香,送飯啱哂!! 

椒鹽九肚魚做得極之好!!! 用五香粉做醃料而唔係一般用蒜頭辣椒咁就叫椒鹽. 用少少粉pok面唔使用厚厚既炸漿,已經可以做到真係外脆內軟,極之高水準!!!! 

潮州春菜第一次食就以為係隔夜菜,黃咁咁,樣就好衰. 其實係用芥菜加腩肉炆到好腍,要肉味同油脂令菜較濕潤. 好入味,做得好食呀! 

食套餐可以半價加個方魚肉碎蠔仔粥,原來原價只係$40,我地用$20加呢個粥真係超抵食,又飽肚,個湯底好甜,每人都有三碗,份量好足,真係飽都要清埋佢. 方魚香脆加埋蠔仔甜味真係唔錯. 食完仲有個喳咋,料好夠而且係認真做,唔係求其架!! 呢餐真係好滿足,好食. 下次一定番黎!!

地址 :  九龍城衙前塱道4號地下
電話 : 2716 1221/ 2383 5011

留言(0) | 引用(0) | 話題(食事)