香港新浪網 MySinaBlog
« 上一篇 | 下一篇 »

係我懶左寫blog既期間,呢間岩浪係我去得最多既日本料理店. 點解? 好食就當然啦,其實最主要係佢師廚Ricky San真係一個好有heart既廚師. 佢好用心去將最美味既食物帶俾佢顧客而唔係單純只為賺錢. 呢度既食物好食,除左食材,Ricky San真係用左好多心思,創作去將食材發揮得最好. 由於每次黎都坐壽司吧檯,一邊食會一邊同Ricky San交流,所以唔單止食得開心,仲傾得好開心. Ricky San亦會將好多日本菜或魚類既知識話俾我地知,其實真係學唔少野架! 都係唔好講咁多,去相!!!

呢個赤貝覺得點先?? 一睇個樣就知勁新鮮啦!!!

平時前菜都係沙律,不過今日因為我訂左午市,但黎到都仲要等左十五分鐘,Ricky San為左賠罪,就整左呢個海膽豆腐做一個高級版前菜. 如果下次你去到又要等,但冇呢個前菜唔好問點解喎,我地既交情又唔同既!! 嘻嘻!! 

由淡到濃,先食白身魚. 呢個深海池魚係食佢肉質爽同清甜,上面有少少梅醬啫喱吊味,就係Ricky San既創作,等一件壽司唔使咁單調,有少少變化. 呢個梅醬都起到作用架,令甜味更突出. 

赤貝極之新鮮又爽甜,鮮甜味只有新鮮先至食得出. 唔新鮮既赤貝係冇乜甜味架! 

針魚都係白身魚,所以食佢爽既肉質同清甜.再加少少天婦羅碎係面,有雙重口感!!  

鰤魚係油甘魚類,肉質軟熟而甜味極之前既濃.

赤身係唔肥既吞拿魚,食佢既鮮甜味,呢件係野生當然比一般更好啦! 加左少少醃魚腸係上面吊味,又可以帶出鮮味!! 

呢件拖羅油脂分佈平均,上面加上三文魚籽同大拖羅碎,令味道更提升. 拖羅既油脂香配上三文魚籽既鮮令你極之滿足!!

帶子好似冇乜特別,但上面有少少蟹膏,又係再將鮮味升華!! 帶子本身都超級鮮甜,再加埋蟹膏有仲鮮味爆炸既感覺!!! 

赤鯥近期電視廣告賣得好行,不過呢度用既部位唔同某壽司店. 我食過廣告推介既係整件魚肉九成係油脂,有點膩既感覺. 但呢度既赤鯥係有魚肉,除左油脂香仲有魚肉甜味,平均番冇咁滯,而且好肯定呢度用既赤鯥都唔同級數,包你食過愛上佢!! 

煙燻鯖魚第一次食. 鯖魚因為有種濃鮮味,有人會認為係腥味,所以一般都係醋漬鯖魚,減低佢強烈既鮮腥味. 今次用煙燻又有另一個效果. 本身呢件鯖魚已經好肥美,再加上燻香味混合油脂味,真係一百分!!!! 我大讚呢個做得十分好!!! 

 

咁靚既碗入邊係迷你海膽飯. 只要海膽靚,就咁食已經極之鮮甜!! 而且飯粒亦係混左海膽,即係膽上加膽,鮮上加鮮!! 太滿足喇!! 

呢個飯當然冇可能係我食架啦,因為已經飽到頂點!!! 係我個大食朋友再加既什錦壽司飯,其實三分二係刺身,只有三分一係飯!!! 太誇張喇!!!!

呢個係午市套餐,有沙律,湯,蒸蛋,咖啡/茶或甜品. 我通常最尾既甜品已經食唔落!! 而且每次都好滿足咁離開. 所以點解我地成日都番黎食因為每次有驚喜又滿足,好難抗拒既誘惑!!

地址 :  銅鑼灣軒尼詩道525號澳門逸園中心9樓
電話 : 2591 1159