香港新浪網 MySinaBlog
« 上一篇 | 下一篇 »

你冇睇錯,我係燒肉店食刺身!! 係咪好奇怪呢??!! 無錯,因為和幸有新人管理,亦都有新搞作. 新人就係之前天后酒樂亭既昌哥,我地一早都已經係佢舊舖幫襯,到而家佢黎到和幸,係佢新人事新作風低下,唔再只係食燒肉,當然要捧下場試下佢燒肉以外既菜色啦!!

就係睇呢個刺身拼盤都夠厲害掛!!!

冰燒鴨胸係自家製,所以肉好嫩,重見到粉紅色架!! 味道唔似現貸有時會過咸. 

炸白飯魚干用白飯魚仔黐係紫菜上再炸,十分香口,送酒佳品.

豆池魚揚原條炸,連頭同內臟都可以食,外脆內軟又有魚香,好食呀!!

刺身拼盤極之豐富,先睇下平貝幾新鮮! 好鮮甜啊! 

未醃製既螢火魷魚唔多,一般出面食既都係醃到咸咸,有啲次貸仲咸到苦添. 正常係咸鮮味,屬於珍味一類,用黎送酒較適合. 不過呢個冇醃就食到魷魚本身鮮味,真係唔錯! 

野生吞拿魚腩就更加厲害,野生既鮮甜味同一般既真係唔同,而且更加肥美!! 超讚!! 

呢個壽司用既白蝦比較大,所以要用人手將蝦殼去掉. 如果細隻既蝦殼軟身就可以連殼食. 大細白蝦我都食過,我就覺得大既更加甜!! 

加拿大海膽就當然較北海道海膽甜度略遜,但入口果種滿足感又唔同既. 各有各好啦!! 

開始食燒物喇!!昌哥最拿手!! 汁燒白鱔肉質好有彈性,不過用濃汁燒就少少蓋過鱔味. 我個人就喜歡鹽燒,皮就會更加脆!! 但呢個都絕對係高質素!!

汁燒雞頸肉就更加巴閉. 原來係用人手係新鮮雞頸拆肉,所以食落十分有雞味,超級好食!! 呢個推介一定要試!!! 因為雞頸肉較嫩,食落又有雞香味,諗起都想即刻食番串!!!!!! 

昌哥好喜歡浸製生果酒. 除左好普遍既梅酒,仲有菊花酒,士多啤梨酒,蜜瓜酒,仲有人參酒添呀!! 今次昌哥好慷慨請我地飲佢浸左三年既珍藏梅油. 呢種好純既梅香味絕對唔係出面買既梅酒可比. 真係好好飲,我都唔好意思飲左幾杯!!

雞掌心係昌哥既刁鑽菜之一. 用既係雞爪中間既掌心肉,食落十分爽口,正! 我相信冇一間有得食!!

牛舌亦係用牛舌心,最多油脂又最厚肉既部份,燒出黎有油脂香肉又爽. 當然火候控制都極之皇要. 呢啲當然難唔到昌哥啦!! 

牛柳燒完加上酸蘿蔔蓉又幾有風味. 不過我就鍾意焦香少少. 但同昌哥傾過,原來日本既串燒牛柳一般都係咁做,唔係要焦香,而係要嫩滑. 咁我又明白喇,係食到佢既嫩滑,因為燒得半生熟,食法又唔同,學左野!!! 

雞尾係朋友臨時要求睇下有冇,又真係俾佢恨到!! 我朋友最鍾意食雞pat pat既油脂香,呢個燒完就更加香添啦!! 其實食雞尾台灣係極之普遍,只不過香港少人食,其實都係食脂肪既香同爽,亦唔會有臭味,只係食唔慣接受唔到唔識欣賞. 我自己都好鍾意食架,尤其燒就更加香!!

鵝肝雞翼又係不得了之作. 將鵝肝釀係已拆骨雞翼內,雙重滿足!! 

尤其我極鍾意食雞翼,又鍾意鵝肝香滑,一次過滿足哂我,真係好開心呀!!!

串燒食完已經好飽,但昌哥都一定要我地試下呢個櫻花蝦豆腐. 佢用櫻花蝦做個脆外皮,入面係嫩滑既豆腐,原來真係好好食. 本來只係想試一啖,點知係好食到要成個食哂!! 哈哈哈!! 

有甜魔在場,一定要求食甜品. 有人眼利見到附近有人食呢個燒芝士蛋糕,大家又好好奇要試下. 甜品有另一個胃大家都知,所以連芝芝士蛋糕都食得落,厲害!! 呢個本來係自己燒,但為免我地搞到燶哂,呢個就燒好俾我好食. 真係好食喎,外面少少脆,芝士香燒完又好出,裡面又好軟熟,正!

我唔食甜都唔可以放過呢個甜品,因為不停聽到隔離朋友大讚好有奶香,我又要食!! 真係好滑溜好香奶味,再加上面既鮮士多啤梨醬,好夾,太好食喇!!!!!!!!!

地址 :  銅鑼灣謝斐道496號金利文廣場3樓
電話 : 2117 4268