香港新浪網 MySinaBlog
« 上一篇 | 下一篇 »
胃食妹ET | 16-Apr-13 | 菜式分類 - 日本菜 | (422 Reads)

前排極之流行既日本拉麵熱潮未淡,舊年係佐敦恆豐中心地庫開左拉麵競技館. 有六間日本有名既拉麵店係呢個地方一齊開,形式似food court咁,不過佢特別在有個BB機,買完麵就拎個BB機埋位,到個機嚮即係個麵整好可以攞得. 其實東南亞,歐美food court都已經用左好耐,唔知點解香港到而家先用. 呀...我知喇! 因為香港人好有效率,其實一買完都差不多已經整好可以拎走唔使等,所以呢個BB機未必太合用. 另外呢度有免費凍或熱既綠茶供應. 所以論配套,呢個競技館真係做得唔錯.

我就反而唔係食拉麵而係沾麵. 咩係沾麵? 就係啲麵點個濃湯汁食,就唔係麵浸係湯入面.

呢間就係常勝軒喇! 

右上角係熱水,等你食完可以加落濃汁度當湯咁飲. 

呢個湯汁用左大量豬骨,雞骨,鰹魚煮出黎極濃,而且好香鰹魚味,呢個係我鍾意常勝軒既原因. 佢另外仲有鰹魚粉同辣椒粉可以加入汁度. 我兩樣都加個味更濃又辣,好食啊!!! 

仲有就係欣賞佢既溏心蛋. 入味又夠溏心,正!! 但佢既叉燒反而一般,略為硬少少又麻麻地夠味,所以我都係揀蛋沾麵,入面有一片咁大把既叉燒.

佢呢個麵好有彈性,唔係淋pat pat. 咁多利好因素加埋,兩次黎都係依然揀佢!! 

地址 :  佐敦彌敦道222號恒豐中心地庫Ramen Champion 6號舖
電話 : 2377 9944