香港新浪網 MySinaBlog
« 上一篇 | 下一篇 »

又黎到澳門試試新菜式. 今次試下新開呢間法國餐廳. 大廚Yannick Ehrsam 曾係法國多間頂級米芝蓮餐廳學藝,之後再到北京得獎法國餐廳工作. 而家就黎到索菲特酒店令我地都有幸可以試到大廚手勢!

呢碟咁靚但又係餐牌搵唔到既? 原來只係大廚為我地準備既開胃小食香煎帶子. 但只係飯前小食都做得咁認真又好食就知道大廚幾有心!! 由於餐廳環境好有氣氛,比較暗,所以之後既相都冇辦法都要用閃光燈.

好精緻既頭盤係鵝肝醬. 入口又香又滑,配有無花果醬酸酸地平衡番鵝肝醬飽肚感. 另外金光閃閃既合桃又係特別. 真係色香味齊全!!!

大大隻鮮蝦做既雲吞,又爽又甜. 加上海鮮湯打既泡沫同黑松露,增加唔少唔同層次既味道.

焗牛柳味道唔錯,不過生熟度可以調教一下. 可能我乜都鍾意生食,可以的話生少少我覺得會更美味.

唔食牛既美女有個海鮮拼盤,十分有睇頭,一上檯大家都驚叫,果然美女有好待遇!! 哈哈!! 有魚有青口,應該都好鮮味!!!

呢個係配牛柳既手工薯球,十分有咬口,唔錯.

呢個甜品都幾有驚喜! 一個圓球原來內有乾坤,係生果同綠茶慕絲,唔太甜都好食呀! 個殼係白朱古力都食得架,不過我麻麻地甜品,只係試左少少.

茶點亦十分精美,真係睇都開心!!! 

因為當晚有事遲到,冇影到餐廳環境,只好用官方照片俾大家睇下有幾靚. 食物唔錯,價錢亦唔貴,值得一試. 但地方唔太大,所以要食就一家要訂位喇!!

地址: 澳門索菲特酒店六樓

電話: (853)8861-8888