香港新浪網 MySinaBlog
« 上一篇 | 下一篇 »

踏入十月,要準備開啟食大閘蟹個胃喇!! 所以汕頭之旅都係要讓步一下,先講下大閘蟹先!

今次係得到文華廳邀請去食用上海成隆行既大閘蟹做既蟹宴. 連成隆行老闆柯先生都特登黎香港同大家見見面,介紹下佢既蟹. 而今年大閘蟹菜式係由文華廳大廚李文星師傅創作,唔似舊年係用成隆行菜式,有成隆行師傅由上海過黎香港煮. 今次菜式十分好,絕對要推介.

上海成隆行有兩位女侍應黎香港表演拆蟹. 我地幫佢計時,只係用左2分57秒就可以將佢拆骨,真係厲害!!! 

蟹身,蟹蓋,蟹蚶,蟹腳全部都處理哂,冇偷工減料架!! 當然我地就即場解決埋佢啦!! 肥美非常!!

我少少地只係食隻蟹腳同少量蟹膏,留番其他俾大家一齊試下!

其實當晚除左大閘蟹菜式,都有文華廳本身拿手菜式,不過平日都食到就唔特別介紹. 今次當然要推介供應有限期既菜式啦!!! 呢個就經典喇,係蟹粉盞. 蛋撻外皮而內裡全部係蟹粉....嘩!!!! 要睇相先知幾澎湃!!!

睇下!!!!! 又蟹膏又蟹肉,好勁啊!! 下面呢張成條蟹腳肉都睇到!! 成個蟹粉盞焗得好香,一啖啖都係蟹粉,真係十級推介!!

另一個好厲害既菜式係蟹粉津白. 熱鍋上熱辣辣食咁先食到蟹膏香氣撲鼻.

用津白係可以係濃濃既蟹粉中帶出點清甜味. 津白都係切絲,有少少仿魚翅既感覺,不過當然只係外型上. 呢個真係無敵,又係必食菜式.

咸魚年糕毛蟹 - 意外地年糕係十分入味,而且咸魚亦帶起蟹既鮮味,好有特色!!

毛蟹既膏都唔錯,不過當然冇大閘蟹既咁香啦! 但年糕真係好好食!! 

極之鮮味既鮮茄木耳蟹湯浸菜苗,簡直係蟹汁精華一樣,太美好喇!! 

禿黃油撈飯係大閘蟹季節必食. 禿黃油係純蟹膏蟹黃精製而成,唔係蟹粉所以冇蟹肉.呢個係成隆行獨有出品,食過禿黃油撈飯我可以保證你一定會愛上!!!!!!! 

最後一道係上海早點,係咪好奇怪呢! 其實呢個係甜品,不過用左上海早點既概念,有豆漿,油條,粢飯. 好有特色亦好好食. 豆漿雪糕豆味好濃,李師傅話除左豆漿,仲有豆腐加落去攪,有口感之餘亦會令豆味更濃. 油條好脆,配豆漿雪糕一流! 粢飯都煎得好香脆!!

呢d大閘蟹菜式由10月27日到11月14日可以係文華廳食到. 而拆蟹表演就至到11月4日. 快啲去喇,而且亦唔太貴,好抵食呀!!!

地址 : 中環干諾道中5號香港文華東方酒店25樓
電話 : 2825 4003

 

留言(0) | 引用(0) | 話題(食事)