香港新浪網 MySinaBlog
« 上一篇 | 下一篇 »

近來都幾鍾意試新野. 朋友話呢度有間韓國食店,海鮮鍋非常正. 我地聽到當然要立即去啦,可惜當日約左舊同事食飯,咁同佢地又比較少食飯,所以都選擇同佢地食. 但同舊同事食既地方由我決定,所以就安排到好近阿利水,等我食完可以立即過去join佢地. 第一餐就唔係食好多,留番個肚去食第二餐. 呢度食物同服務都唔錯,而且仲有個韓藉侍應(佢話o者,但我地估佢係老細之一)十分搞笑又親切,絕對要加分!!

巨型海鮮鍋!!!

六個人有六碟前菜,唔知有冇關係呢? 不過由於我遲到,所以都食得七七八八. 每款味道唔錯,我自己就最鍾意黑豆. 雖然甜甜地,但佢有黑豆獨特味道,好食呀! 

海鮮鍋 - 材料有帶子,蟹,蝦,鮑魚,扇貝同蔬菜類. 呢個係辣鍋,都幾夠辣,又有海鮮鮮味,唔怪得知朋友極力推介啦!!!

紅燒牛排 - 其實即係炆牛肋骨. 味道偏甜,有少少蓋過牛味. 不過都炆得幾腍幾入味,都可以既. 

海鮮蔥餅 - 食果陣冇太留意有咩海鮮,不過係有鮮味,又夠多蔥,個邊都脆脆地,好食! 

豬血米腸 - 其實個餡唔係全部豬血,而係韓式粗粉絲加豬血再釀係腸衣內. 味道係比較淡,不過佢有個辣鹽俾你點. 係辣椒粉溝鹽,點少少就好喇,唔係會太鹹. 味道都幾得意,果然好地道!! 

豆蓉湯 - 用黃豆磨蓉煲成湯. 豆蓉唔係磨得好碎,食落都係有粒粒,但黃豆味十分香,唔錯. 又係未試過既地道食品. 

清麴醬湯 - 之前有一檯點呢個,一出黎係臭到全場望住果檯!! 我當時未到,但朋友形容為臭到好似成個月冇洗既臭襪咁臭. 到我地食時,我都覺得臭,但其實係發酵既味道. 再食落係似納豆. 因為我都鍾意食納豆,所以又唔覺得太大問題. 但當中有朋友真係唔多頂得順囉!!! 笑死!! 

韓式水冷麵 - 又凍又清,食完辣野解辣都唔錯,當然我唔使解辣啦!! 點解有兩隻手指? 因為果位韓藉哥哥仔話係鉸剪喎!! 真係好搞笑!! 呢個麵都幾煙韌,幾好食. 

敬送燒多春魚 - 哥哥仔見我地仲有酒未飲哂,就請我地食呢個多春魚要黎送酒. 其實時間都唔早,佢地都差不多要收舖,但佢都仲整野請我地食,又冇趕我地走,真係服務十分好!! 

地址 : 尖沙咀厚福街8號H8 3樓
電話 : 2369 8008

留言(0) | 引用(0) | 話題(食事)