香港新浪網 MySinaBlog
« 上一篇 | 下一篇 »

又係好友安排既飯局. 我呢位朋友好多諗頭,又安排得十分妥善,所以每次去佢搞既飯局都好有期待. 繼上次天龍軒之後,今次搞個主題飯局係'雞',不過唔係只食雞,而係食有'雞'字既菜式!! 佢真係好有心思. 唔單止安排酒,菜,仲做埋小禮物俾我地,真係十分感動呀!!!

經典嘅金錢雞

環境寬敞,不過樓底較矮.

菜單一早準備好,仲配埋酒,真係辛苦哂佢!!

咖哩雞酥 - 小食做得十分精緻,雖然只得一口,但酥皮好鬆脆,咖哩味輕柔,唔會太嗆.

蜜味金錢雞 - 先上一道經典懷舊菜金錢雞. 多數食過既朋友都會覺得新蒲崗既得龍做得最好. 但各人食過之後都一致認為呢度做得更加好!! 其實呢味本身餐牌係冇,只不過朋友同師傅熟落,想玩下野做'雞'字菜式先諗起做金錢雞.  雞肝軟熟甘香,肥肉爽口,叉燒夠腍,完美配搭!!

燒雲腿拼片皮雞 - 係陸羽食過,不過係雲片鴿甫. 果個真係唔得. 雲片又鹹又硬,鴿甫仲衰,勁梳打味,完全食唔到有鴿味. 反觀呢個雲腿有浸過糖水,唔太鹹又軟熟. 而且再炸過,個邊係脆架!! 片皮雞雞皮又薄又脆,肉質嫩滑又有雞味,真係一流呀!! 

江南百花雞 - 其實只係雞皮釀上蝦膠,冇雞肉. 蝦膠當然係鮮甜彈牙,雞皮甘香又爽口,肥都要食呀!! 再加上個蛋白花薄獻令食落口感更滑溜!! 

三弄田雞 - 椒鹽田雞腿 / 韮菜花崧子炒田雞腿 / 蟲草花蒸田雞腿 

椒鹽田雞腿 - 完全冇諗過好友可以咁有心思做田雞腿三食!! 諗到又要做到先好野!! 師傅肯配合佢做出三款唔同風味,當然有留咁上下熟落先至做到啦! 椒鹽絕對係我口味,而且冇咁大隻田雞腿,炸出黎都縮水啦! 呢個肉質嫩滑,唯一要彈就係椒鹽味欠奉,只可當普通炸田雞腿,但都已經好好食.

韮菜花崧子炒田雞腿 - 田雞腿仲要起肉去炒,我肯定普通大廚都唔會睬你. 又一次証明大廚同好友關係唔錯先肯幫佢做. 不過又唔好以為收你貴d同你做喎,呢餐唔係好貴架咋,完全係友情價. 講番個炒田雞腿,肉質更加嫩,同其他配菜都十分夾. 

蟲草花蒸田雞腿 - 蒸既又另一個口味. 蟲草花係近來新興食材,味道濃郁有菇既香味. 同田雞腿一齊蒸令肉質更鮮甜! 

咕嚕素雞球 - 又一款玩字既菜式. 有雞字但冇雞肉. 素雞球炸得香脆,甜酸汁亦平均得十分好,最愛甜酸味既我食完一件又一件!!!

雞油花雕蒸花蟹拌伊麵 - 一上檯大家都嘩然!!! 咁大隻蟹又咁多,完全蓋住哂d麵,簡直係大贈送!! 睇下個蟹鉗仲大過個iphone呀!! 夠誇張味呀!! 肉質鮮甜就當然不在話下啦! 而且伊麵配上雞油花雕汁,食完都唔夠喉!!!! 實在係太美味喇!!!!!!!! 

福鼎苿莉毛峰 - 最後以青茶黎完結消消滯! 其實係太好食,仲想食就真!!! 哈哈哈!!

拔絲雞蛋黃 - 其實唔係雞蛋黃,只不過係蕃薯其中一個品種別名. 呢個拔絲係我食過最好,因為佢小心翼翼唔比個外殼穿,要完整冰水先至唔會滲入. 個殼真係好脆,蕃薯亦夠甜,好食呀!! 

好友再帶黎雞仔餅,雞屎藤,雞蛋仔做甜品,真係夠哂心思!!! 完全係一個不可多得既真正食家!!

店方準備既甜點,即時給比下去!

好友原來一早上到酒家,細心將雞仔餅,雞屎藤,雞蛋仔包裝好一小份禮物送俾各位參與既朋友,真係體貼得無話可說!! 真係再次要多謝呢位好友!!!!!

再次同大家講聲呢晚菜式絕對係友情奉獻,九成都係off-menu. 千萬唔好去到叫個三弄田雞,佢一定唔會睬你囉!!! 哈哈!!

地址 : 尖沙咀梳士巴利道18號香港洲際酒店地下
電話 : 2313 2323 / 2721 1211

留言(0) | 引用(0) | 話題(食事)