香港新浪網 MySinaBlog
« 上一篇 | 下一篇 »

近來真係十分懶,幾日先出到一篇食評. 呢個又係成個月前食左都未寫,希望仲叫update啦! 好友對於新店同新菜式都好有興趣試,問我想唔想試呢間,我當然有興趣啦!! 其實文鼎壹號係國內好出名,今次開到黎香港都對佢有一定信心!! 食物水準好高,服務都唔錯,應該有作為既!!

招牌菜之一 - 醉青蟹!!!

 

門面,裝修都富麗堂皇,連椅背都用閃石,都幾浮誇! 哈哈!!

餐具都十分精美!

雙味龍頭烤 - 上菜後唔可以相信佢係九肚魚. 好明顯係將魚抽乾,做成魚乾形式,再用醬油醃製. 鹹鹹香香,絕對係上佳佐酒小食.

目魚大烤 - 擺碟完全似係法式!! 不過都幾靚嘅! 其實係醬油八爪魚,炆得入味又夠腍,又係適合送酒.

文鼎河蝦仁拼依雲豆腐 - 晶瑩剔透嘅河蝦仁十分有河蝦嘅鮮甜味. 一般上海店做嘅只係得個爽字,蝦味欠奉. 但呢個真係我食過最好食嘅河蝦仁!! 依雲豆腐細細粒都炸得脆脆,而且漿粉亦十分薄,完全睇到師傅功夫!!

文鼎紅燒肉拼家燒蘿蔔 - 紅燒肉賣相已經嬴哂!! 肥瘦適中,肥膏真係溶係口架!!! 而瘦肉部份亦都鬆軟,一流! 我怕肥都忍唔住食哂成件!!

醉青蟹 - 呢個係好友主要想試嘅其中一味. 生醃青蟹,充滿花雕香味. 睇見啲蟹膏真係吸引到不得了!! 食得各人都十分滋味!!! 而家睇番張相都係咁吞口水!!!! 哈哈!!

潮式檸檬煎魚咀 - 又一道出色嘅招牌菜. 睇佢將魚頭切得十分工整就知道製作認真. 魚頭炸得十分鬆脆又唔油膩,絕對係高水準!! 再加上清香嘅檸汁,真係超好食呀!!!

文鼎十八斬 - 係呢度另一道招牌菜. 睇個賣相已經好厲害!! 師傅亦係'大廚出馬'節目表演過. 呢款都係醃生蟹,不過汁醬就唔同,薑蒜味重好多,而且係用醬油唔係用酒. 其實都係好好食,但我就喜歡醉青蟹多啲!

香烤鯧魚 - 做法似之前嘅九肚魚,不過肉地夠,口感唔錯,味道亦係鹹香類,又係送酒美食.

拼三臭 - 傳統浙江菜式. 三臭係冬瓜,莧菜莢同茄子. 其實一啲都唔算臭,反而係偏鹹. 不過幾有特色,一食無妨.

水晶粉皮卷 - 友人睇見餐牌照片好吸引,即管點黎試試. 其實係水晶皮卷住鮮蝦及莧菜. 水晶皮幾煙韌,又唔會太乾,唔錯. 不過一定要點汁先好食,一般啦!!

菠菜麵 - 完全冇菠菜味,得個樣.

肉醬 - 味道完全係一個蕃茄肉醬,冇任何其他味道,唔得.

上湯 - 好似滾完雲吞嘅上湯,一陣麵粉味,唔掂.

菠菜陽春麵 - 真係得個樣,一定要好好改善!!

寧波湯丸

酒釀丸子

地址 :尖沙咀彌敦道63號國際廣場(iSquare)2501 號
電話 : 3153 2188


[1]
私人留言 (按此查看)
Akiko
[引用] | 作者 Akiko | 27-Jun-11 | [舉報垃圾留言]