香港新浪網 MySinaBlog
« 上一篇 | 下一篇 »

已經好耐冇鋸扒喇,一來都幾貴,二來好難搵到好地方. 去過比較滿意算係Morton's. 近來係面書見朋友提及Grand Hyatt新開扒房唔錯都好有興趣試試. 由於呢間扒房都係熱捧中,訂位有少許困難. 但竟然有食友打去事旦訂左一日佢有位問我去唔去. 咁難得機會就當然say yes啦!! 呢度其實係前JJ's disco,我年青時都好多時會黎玩. 而家全新裝修,已經睇唔出以前一點痕跡,唯一係地下入口都仲係一樣. 牛扒果然有驚喜,連價錢都十分驚喜!! 服務都唔錯! 所以已經訂定下一次再黎喇!!!

睇個樣真係極之吸引!!!

環境比較幽暗. 多數係闊落卡位.

睇過酒牌價錢mark up偏高,所以退而求其次飲啤酒都唔錯啦! 其實我都唔係無酒不歡,唔飲酒都冇問題架!!

 

蒜蓉包 - 先上熱辣辣,脆卜卜蒜蓉包,蒜蓉加埋香草更加香,食到唔停口,仲可以refill添. 不過好彩朋友有先見之明唔要,如果唔係連扒都食唔落!

高級餐具

Crab cake - 三件大大件蟹餅,三個人一人一件剛剛好唔使爭!!近乎全蟹肉,鮮甜無比. 外面亦煎得脆脆!! 超美味!

Beef tartar - 生牛肉味道略淡,但亦可以食到鮮肉味. 多士烘得好脆,配生牛肉他他最好不過.

US Rib-eye - 餐牌內牛扒主要分美國同加拿大. 加拿大相對價錢較高. 我地未知佢質素如何,先試較經濟既美國牛扒. 呢個rib eye係18oz. 大得嚇人,但價錢仲嚇人,只係$380!!! 最重要係肉既質素十分好,超嫩滑,火候亦剛好係medium rare. 表面燒得焦脆有炭燒味,內裡肉味濃,唔過熟但又唔會血淋淋,真係一流!!!

 

US Entrecote - 另一款係西冷. 肉質較鞋,但肉味都一樣濃,而且表面燒得更脆. 但我個人好喜愛rib eye肉嫩,所以真係超值. 呢個西冷都唔好睇少佢,有16oz. 令我地三位女事都要休息一輪先可完成兩件巨扒!!!

Creamy spinach - side dish都好多選擇,一律$65. 朋友較喜歡菠菜,所以揀左呢款. 但由於件扒份量好多,呢個菠菜蓉有忌廉都幾滯,所以我只係淺嚐.

地址 : 灣仔港灣道1號君悅酒店地下
電話 : 2584 7722


[1]

多謝詳細介紹,我和老公已經訂了下星期二去 ^^


[引用] | 作者 小頭 | 19-May-11 | [舉報垃圾留言]


真係唔錯. 好食又抵食. 我自己都已經訂左檯再去. 希望你地都食得滿意啦!!

[引用版主回覆] | 作者 胃食妹ET | 19-May-11