香港新浪網 MySinaBlog
« 上一篇 | 下一篇 »

呢日又去譚魚頭解吓辣癮. 可能好多朋友都只係知譚魚頭出名食火鍋,其實佢小菜都十分唔錯架!! 反而我只係去食過一次火鍋,其餘次次都係食小菜. 佢除咗出名嘅四川菜之外,其實佢都有做廣東菜嘅師傅,而且亦都一樣水準唔錯架! 如果未去過譚魚頭食小菜真係不妨一試,無論川菜,粵菜我都有信心會包你滿意.

鍾意食辣嘅朋友睇到呢張相都一定流口水啦!!!

八寶茶 - 有一排冇去都唔知佢而家有八寶茶. 只要加$3就可以有杯咁靚好好飲嘅八寶茶喇! 個杯又靚,仲有材料豐富,仲咗五次水都仲係咁甘白,咁好飲!!! 推介!

青雲飄香 (桂花糖青瓜) - 爽脆青瓜上淋上薄薄桂花糖漿,好香好清甜,清新嘅涼菜.

跳水墨魚鬚 - 跳水即係解新鮮. 果然片得薄薄嘅墨魚鬚好鮮味,再加個花椒汁嘅麻,好有特式,好好食呀!

涼伴蟲草花 - 係新菜單見到有呢個蟲草花好想試. 果然係爽口再加辣汁又係一道唔錯嘅新菜式.

四川樟茶鴨 - 由四川直送嘅樟茶鴨果然係非一般. 燻味濃郁,鴨肉嫩滑,個個食完都讚不絕口!!

香辣龍蝦 - 呢個其實已經食過幾次,但就係因為太好食,所以每次都要食. 用嘅係龍蝦仔,肉質較嫩. 最厲害係個味道真係夠香夠辣!! 絕對係合我口味嘅辣度!!!! 而且炸得香脆,龍蝦仔殼又薄,所以我連爪都食埋呀!!!!

麻婆鮑魚豆腐 - 印象中好似食過,不過今次鮑魚切花,刀功了得. 不過又可能切花太細,變咗煮嘅時候失去鮑魚味,只係咬緊一啲似魷魚質感嘅食物. 不過個汁實在美味,加埋豆味香濃嘅豆腐,朋友都要叫碗白飯送. 

泡椒桂花蚌 - 桂花蚌爽脆鮮味,加上酸酸辣辣嘅泡椒配搭都唔錯!

雞汁蘿蔔 - 清甜冇渣嘅蘿蔔用雞汁煮過更鮮甜!! 辣完一輪可以清一清!!

宮寶雞丁酥 - 用宮寶雞丁做餡料十分創新. 不過餡料味道唔夠濃,食落較平淡. 而且呢個酥比較大,食一個已經好飽. 另外酥皮可以再酥啲就好喇!!  

酸辣粉 - 食過土瓜灣分店嘅極之美味,不過呢個加咗辣都未夠勁,似乎下次要再挑戰極限,哈哈!!

担担麵 - 呢個担担麵版本我鍾意呀!! 一來個麵質十分軟滑,另外個湯底冇一般勁多麻醬,好似食花生糊咁. 只係淡淡辣味加芝麻已經好好食!! 其實好想打包番屋企,不過過幾日又再嚟,到時買個外賣啦!! 哈哈!!

楊枝甘露 - 好新鮮嘅柚子肉同芒果,清甜唔多奶,超正!!! 我好少話甜品會好食,真係好難得架!

生果 

地址 : 尖沙咀金巴利道26號2樓
電話 : 8120 0033

留言(1) | 引用(0) | 話題(食事)

[1]

哈哈 睇到個辣粉 已經好好好紅啦 哈哈 妳受得辣喎 佩服佩服~~~


[引用] | 作者 san | 08-May-11 | [舉報垃圾留言]


都唔係呀,睇落辣但食落唔辣. 不過我都係食得辣就真嘅!! 我另一別名係'辣妹'呀!!

[引用版主回覆] | 作者 胃食妹ET | 08-May-11