香港新浪網 MySinaBlog
« 上一篇 | 下一篇 »

收到The Mira公關Phoebe邀請試試佢地旗下餐廳. 比較出名嘅國金軒同Yamm都已經去過好多次,所以希望試試Whisk嘅法國Fusion菜.

原來當日只有我同公關兩人,令我立即諗到如果公關每次只陪同一,兩位blogger進餐咁佢咪成日都要食食食??!!! 不過學Phoebe話齋,飯都係要食嘅,睇下食得幾豐富咁啫! 哈哈,又係喎! 坐低後,我就由Phoebe發板,點一啲推介菜式.

睇下個樣都已經好吸引喇!!!

我地坐近露天茶座,望出去陽光普照,心曠神怡!!

室內裝修得有氣派但唔會庸俗,仲有啲清新感覺!!

先點杯鮮榨西柚汁開開胃!

Lobster Bisque - 有別於一般龍蝦湯. 先上係碟底下用龍蝦湯蒸嘅滑蛋,鮮甜滑溜.上面有龍蝦湯泡沫及配上新鮮海膽,賣相十分精緻. 再嚟就係將容器內鮮濃嘅龍蝦湯例入碟內. 滑蛋配濃湯,幾重口感,超美味呀!!!

Steamed Escargot - 平日食嘅蝸牛多算都係放上薯蓉面牛油焗. 今次呢個係蒸. 蝸牛肉用菠菜包住蒸熟,原汁原味.另外有紅菜頭做汁及泡沫,好睇又好食!! 呢個粉紅色真係好靚,好吸引呀!!

M7 Wagyu Beef Sirloin “Rossini” - 我本身係食肉獸,所以請Phoebe推介肉類. 當然呢個和牛最討我歡心啦!! 擺碟已經先聲奪人. 就係中間幾件粉紅色嘅和牛已經令我雙眼發光. 香濃肉味加上牛脂香味,真係食唔唔停口. 另外兩件鵝肝外脆內軟,軟得似滑豆腐一樣,味道甘香,差啲變成主角.另外有幾件菠菜蓉,仲有賣相極靚嘅黑松露薯蓉. 薯蓉內黑松露香氣四溢,開始飽但都要食多幾啖.但最終都唔可以成個和牛拼盤完成. 呢個份量的確幾大!!

Japanese Scallops - Phoebe點呢個帶子真係不得了呀!!! 可以話係我見過最大嘅帶子!!!! 但大得嚟煎得火路剛好,內面半熟唔過硬,鮮甜. 仲有和牛面頰意大利雲吞. 雖然我冇食,不過每款食物都已經咁有水準,我有信心呢個都一定好食!!!

Petite four - 我都有食,因為size夠細,好精緻!

Fresh Fruit in Champagne Jelly - 食到飽飽,本來唔食甜品,但都想影吓相,所以點一個清清地嘅Champagne jelly. 講真個啫哩香檳味唔重,不過勝在淡淡地,梅類酸酸地幫助消化! 賣相仲咁靚,睇都開心!!

飯後離開之際發現呢間function room. 舒適,幽雅.

Phoebe帶我到另一邊Chef Table,setting好似MO嘅Krug Room. 不過佢平實好多,冇Krug Room過份美麗! 哈哈!!

隔住單面玻璃可以清楚睇到廚師準備食物,呢個的確十分啱我地,最鍾意去參觀食肆廚房!! 下次可以考慮搵班好友嚟試試!!

再次多謝Phoebe熱情款待!!!! 食得,傾得都好開心呀!!!

地址 : 尖沙咀彌敦道118號The Mira 5樓
電話 : 2315 5999


[1]

嘩..d食物好吸引仲要用上咁特別既醬汁.

JO
[引用] | 作者 JO | 29-Mar-11 | [舉報垃圾留言]


呢間真係唔錯,進步左!

[引用版主回覆] | 作者 胃食妹ET | 30-Mar-11

[2]

d食物賣相好靚噃..


[引用] | 作者 尖東為食公關 | 30-Mar-11 | [舉報垃圾留言]


係d食物擺得靚唔係我影得靚. 果日冇set white balance諗住用自然光,不過效果都唔太好.

[引用版主回覆] | 作者 胃食妹ET | 31-Mar-11

[3]

我想問每位要幾銀呢?


[引用] | 作者 力奇 | 02-Apr-11 | [舉報垃圾留言]


呢餐唔可以作準,因為係試菜,所以係叫多咗. 咁呢餐係$700一位. 如果set lunch係二百頭,唔錯架!!

[引用版主回覆] | 作者 胃食妹ET | 02-Apr-11

[4] Re: 胃食妹ET
胃食妹ET :

呢餐唔可以作準,因為係試菜,所以係叫多咗. 咁呢餐係$700一位. 如果set lunch係二百頭,唔錯架!!



thx, 呢個係散叫?


[引用] | 作者 力奇 | 02-Apr-11 | [舉報垃圾留言]


係呀,散叫架,夜晚都係呢d. 不過我睇過個set都唔錯,值得一試.

[引用版主回覆] | 作者 胃食妹ET | 02-Apr-11

[5] Re: 胃食妹ET
胃食妹ET :

係呀,散叫架,夜晚都係呢d. 不過我睇過個set都唔錯,值得一試.



THX , 搵日去試試先


[引用] | 作者 力奇 | 02-Apr-11 | [舉報垃圾留言]