香港新浪網 MySinaBlog
« 上一篇 | 下一篇 »

媽咪約一家人食飯,竟然揀咗一間我未聽過嘅酒樓,仲要係土瓜灣咁偏僻真係幾特別. 呢間酒樓唔太大,但門面幽雅,想走高檔路線,坐得舒服當然好,不過食物質素都好重要. 我個人覺得質素就一般,相信食點心會好啲. 服務亦未盡完善,上甜品前要三催四請先收碗碟同換乾淨碟食生果. 但明顯人唔算多,只係訓練不足. 希望慢慢會有進步啦!

鮑參肚燴翅 - 果然鮑參翅肚都有,十分足料,湯底亦唔錯,幾鮮甜. 第一個印象唔錯.

鮮蟹肉扒豆苗 - 其實一睇就知唔係'鮮'蟹肉,邊有咁多時間去拆蟹肉丫,而且冇咩鮮味,當然只係一pack pack嘅急凍蟹肉. 有時既然俾唔到好嘢人,不如就直認,唔好令人有期望. 如果佢話只係普通蟹肉扒豆苗會更好. 但凍成咁都可以俾你食豆苗,佢成本都唔少. 

翡翠花姿玉帶子 - 帶子少咗啲,花姿片ok啦,最好食係翠玉瓜! 

清蒸老虎斑 - 火路合格,但如果以六人餐嚟講條魚就細咗少少. 

富貴黃金蝦 - 相信係炸過幾次,因為蝦頭已開始燶,同埋咬落係極脆. 味道唔錯,夠香口啱我!! 

秘製私房雞 - 菜單上唯一藥膳主菜. 有藥材味,不過雞件斬開蒸一定老哂. 話就係招牌菜,但我覺得仲有好多進步空間,絕對唔可以叫招牌菜. 實在有待改善.

生炒糯米飯 - 又一次改錯名. 明明唔係生炒點舛又叫佢生炒呢? 不過我就覺得只要好食,生唔生炒其實冇問題. 如果只叫佢臘味糯米飯感覺會更討好. 呢個其實都唔錯嘅.

生果 

糖水 - 好似係紅棗水,大家都估唔到果件係咩,總之唔係芋頭. 但講真呢個味道真係好唔錯,唔喜歡甜品嘅我都飲哂!! 

地址 : 土瓜灣新碼頭街38號翔龍灣廣場地下G07號舖
電話 : 2380 8906

留言(0) | 引用(0) | 話題(食事)