香港新浪網 MySinaBlog
« 上一篇 | 下一篇 »

一向甚少食迴轉壽司,最多都只係去最近公司既板前食佢set lunch. 今次見屋企附近新開迴轉壽司又即管去試試. 假期某日唔煮飯就拉埋媽咪去試下. 冇抱任何期望去反而又覺得佢唔錯. 我都知自己食野要求低,所以食咩野都覺得好食. 我就係咁架喇,食咩多數都覺得好食,又唔會彈三彈四,個人都開心d啦!!!

三文魚,三文魚腩,帶子 - 奇怪地三文魚薄切,但三文魚腩又幾厚切. 一般三文魚已經俾香港人食cheap哂,唔明點解又會切得咁薄. 價錢就唔記得喇,同魚腩都差唔多,總之都幾新鮮. 三文魚腩亦十分肥美. 帶子唔係珍寶都已經好大好鮮甜,再大d咪好誇張??!!!

海膽 - 膽粗粗又試下佢個海膽,哈哈,當然係唔得啦,唔太甜又唔夠鮮味. 不過呢d都係我食壽司必食,所以好好醜醜都要試下既,最多下次唔食囉. 

左口魚背,甜蝦,蟹棒 - 一定要講講個左口魚背,真係肥美得緊要,入口滿口油脂香,一流呀!!! 仲要做緊特價只係$8一件. 甜蝦都好甜好爽,又係$8,抵啦!! 最後個蟹棒就一般啦,$5件叫做試下囉,因為佢而家海,陸,空三寶做特價嘛!! 食完忍唔住都要再encore左口魚背同甜蝦!!!

海鮮烏冬 - 媽咪食日本野咁多生野點都要食番d熱野. 本來佢想叫拉麵,不過我怕有鹼水味,所以都係叫烏冬穩陣d. 烏冬過腍少少,不過都幾滑,而且再吸埋湯汁都幾好食. 個湯底係豬骨湯,都幾甜,唔多味精. 叉燒又腍又入味,唔錯. 天婦羅蝦都好爽,炸得唔油膩. 媽咪都幾滿意. 

地址 : 美孚新村萬事達廣場1樓N84B-85舖
電話 : 3427 9595

留言(0) | 引用(0) | 話題(食事)