香港新浪網 MySinaBlog
« 上一篇 | 下一篇 »

同地盤好同事食團年飯,又搵間新地方試試. 睇小臣個blog介紹過,呢間食物都算唔錯,服務十分好,又免開瓶,實在係唔錯聚會地方. 不過佢收得早,十一點都已經冇哂客,因為佢主要做街坊生意. 五個人,五支酒,仲要有一個唔飲,加埋十三個餸,盡慶呀!!! 今次破例有埋價錢,因為實在抵食,平到好深刻印象,所以忍唔住要話俾大家知!!

半隻燒鵝 $118 - 皮都算脆,但未係最脆,不過肉就醃得好入味,十分唔錯!

燒腩仔 $48 - 切得太薄小家咗啲囉. 不過皮都好脆嘅. 睇番以前食評啲相都冇咁薄,真係....

老火湯 - 羅漢果野葛菜生魚湯 $68 - 味道濃郁,十分足料,冇味精. 每人成兩,三碗,份量好夠!

砵酒焗美國桶蠔 $98 - 唔係先炸,但桶蠔都十分新鮮肥美又入味,唔錯.

陳皮蒸九孔鮑魚仔 $98一打 - 都幾鮮甜,不過有幾隻細咗少少啦!

蒜蓉粉絲蒸蟶子 $16隻 - $16算好唔錯喇!! 火路剛好,唔會太老.

椒鹽鮮魷 $50 - 味道好好,魷魚新鮮,不過又真係好少喎. 數埋都冇十件.

脆炸黃金豆腐 $32 - 正宗外脆內軟,抵食.

蒜子火腩豆卜煲 $32 - 又係抵食之選.

麵醬肉碎生菜 $32 - 肉碎好好食呀!! 生菜又夠爽,份量都唔少.

臘味炒芥蘭 $42 - 包冇失拖嘅一味! 得呀!

椒鹽九肚魚 $32 - 呢碟簡直驚喜. 十分香脆又乾身,內面九肚魚軟棉棉,真係好好好食呀!!!

欖菜肉碎四季豆 $32 (冇哂欖菜) - 四季豆爽脆又夠鑊氣,收工前最後炒呢碟俾我地都好好食!!

地址 : 樂富聯合道182-188號地下金國大廈
電話 : 2337 0294

留言(1) | 引用(0) | 話題(食事)

[1]

五個人吃?
有沒有吃剩打包?
如果真的吃完
那真的跟我們有的拼


[引用] | 作者 | 19-Feb-10 | [舉報垃圾留言]

:
五個人吃?有沒有吃剩打包?如果真的吃完那真的跟我們有的拼

全部食清!! 我地食力好強架!!!

[引用版主回覆] | 作者 胃食妹ET | 20-Feb-10