係紅磡食完個豐富午餐,係黃埔行下街. 我其實就唔係鍾意行街買野既典型香港女仔,不過有需要買都會行下,睇下既!! 想買多幾對高跟鞋好耐喇,不過腳太細,實在極之難買. 今次係黃埔睇到有唔錯既,一試就好fit,係俾錢之際,成間舖每一個sales都走黎同我sale其他鞋款. 係'每一個',我已經話左睇唔o岩我唔會試,但佢地幾個人圍住我,我果刻有諗會唔會落閘放狗架,痴線架!!! 我以後都唔會再去架喇!! 幾靚都冇用,咁即係趕客走,實在不智!!!

俾人圍完之後,再行多陣消化下,就去葵芳搵媽咪食個下午茶. 本來想high high地食個high tea,不過媽咪唔想去太遠,佢係葵芳學完古爭係番葵芳食,好彩佢都有好介紹去A-1.

下午茶set有公司三文治. 份量又多餡料又豐富!!

睇見都即刻想食!!!! 多士烘得脆脆,又唔太濃,入面有美味材料,如果唔係咁飽,我一個人都可以食哂佢!!! 

另一款set係燒雞蕃茄三文治. 呢個賣相就一般喇. 麵包唔烘唔好食架!! 不過雞肉幾嫩,但就皮下脂肪多左少少. 好在夾埋蕃茄食又唔太滯. 不過食完已經飽哂!!!