食友為華仁舊生,但又竟然搞局係皇仁,真係幾有趣. 之前睇過佢食評見評價唔錯,所以都好期待呢次飯局. 食物十分唔錯,再加上阿哥,阿姐十分友善又風趣,令大家食飯氣氛好好!!! 值得再訪!!

大大個招牌一定唔會搵唔到啦!!

碧綠鴿片炒桂花蚌 - 呢味比較行貨. 起初心裡面仲諗乜完來係咁既貨色咋......

百花西汁蝦膠釀油條 - 食第二味心情開始轉好! 油條先炸得脆脆,釀上蝦膠再炸,加上獻汁後都依然脆卜卜,十分唔錯!!

原盅菜膽杏汁豬肺湯 - 湯內有好多杏仁細粒,可以話佢真材實料,但又可以話佢比較鞋口. 我個人會喜會將杏仁磨蓉後隔渣,飲落口感唔會太多粒粒. 不過呢個明顯火路唔夠,但都算中規中距.

糖桂花餞桶蠔 - 見到隻蠔咁巨型已經由心笑出黎!! 一夾之下原來外面炸得脆,加上甜甜桂花汁都唔錯. 不過其實可以甜味輕少少會更好. 但每隻蠔極之肥美,明顯有細心挑選過每隻大細一致.

蝦子袖皮扣鵝掌 - 柚皮好腍,冇澀味,亦好入味. 鵝掌滑得不得了,但又唔會爛溶溶. 我地圍少一個人,咁我就唔客氣食多一隻鴨掌,因為實在太美味喇!!!!

雙冬生扣羊腩煲 - 羊腩每件都有皮,炆得夠腍入味之餘又夠足料. 冬筍,馬蹄,枝竹樣樣都有,一流!!

羊腩煲生菜 - 生菜吸哂羊腩汁當然好味啦!!!

脆皮炸子雞 - 外皮幾脆,不過就冇雞味. 但都已經唔錯喇!

臘味生炒糯米飯 - 未上檯前大家都估計究竟係咪生炒呢. 結果出黎都應該係蒸半熟後炒. 但無論如何,只要好食我又唔係太計較. 呢個味道,材料都好好.

蝦籽伊麵 - 炒得十分乾身,加埋蝦子好香. 雖然好飽都食埋啦!!!!

湯丸腰果露 - 絕對係生磨,連甜品都做得十分認真,抵讚!!

生果