好友有幸被抽中,攞到國宴煙花宴的一張十二人檯. 雖然錢都要俾,但要抽中亦唔係易事. 警隊內警官或以上級別為數唔少,而有美食靚境睇煙花相信當中亦好多人有興趣. 今次可以去到真係好開心,仲要可以帶埋媽咪認識我一班好食友都好難得.

先上燒味拼盤 - 有雞,有鴨,有义燒,有海哲,份量多,好豐富呀!

雞肉螺片炒蜜糖豆 - 雞肉同螺片都落咗梳打粉,失去原味. 反而蜜糖豆好清甜爽脆,我食咗唔少. 

沙律鳳尾蝦 - 呢個菜式多數有個問題就係太多沙律醬. 其實我覺得一般人都唔會太好沙律醬,因為的確比較肥膩. 

竹笙扒上素 - 菜類食品我都係興趣一般. 

紅燒翅 - 意外地魚翅份量唔少,湯底亦唔錯.

食到一半就要去睇煙花喇! 我地全部人上哂天台睇. 位置雖然未算太正中,不過始終露天現場睇感覺會較震撼. 我用我部cheap cheap傻瓜機嘅煙花mode影出嚟效果都可以喎!!

睇完煙花繼續食!! 

鮑魚冬菇生菜 - 不過不失. 完全係結婚酒席翻版. 

清蒸海斑 - 意外地蒸得火路剛好,比地上星期婚宴嘅魚肉更嫩滑. 

當紅炸子雞 - 炸得香脆,惹味! 

乾燒伊麵 - 冇食....太飽喇! 

荷葉五穀飯 - 都冇食 

美點雙輝 - 甜品當然唔好預我啦! 

百年好合 - 仲唔係同婚宴菜式一樣. 不過以二百幾價錢嚟講都好抵食喇!!!! 起碼唔使做幾舊水人情先啦!! 哈哈!! 以下仲有各位好友帶嚟嘅美酒數支.