香港新浪網 MySinaBlog
« 上一篇 | 下一篇 »
胃食妹ET | 08-Jun-09 | 飲飲食食 - 大角咀 | (1004 Reads)

今次算係幾個月來首次出席大局同一眾食友會面. 近來喜歡飲魚湯,無論咩魚,總之係魚湯都鍾意. 所以今次係魚做主題嘅飯局又點可以唔出席呀!!

古法灼鮮魚皮 - 比起河鮮店嘅白灼魚皮腍身好多,唔係爽,味道亦唔太鮮味,所以感覺冇咁好食. 不過賣相就真係唔錯!!

 

艇家王魚春凍 - 好特別嘅魚春凍. 其實係黃花魚春略醃製鋪平蒸熟再雪凍. 食落鹹香,唔錯!!

乞兒砵焗魚腸 - 魚腸食得多. 最愛當然觀塘森記. 不過呢個魚腸配對唔比森記弱,而且可以話更好. 魚腸份量極多,又唔苦,食落啖啖魚肝加魚腸,真係好滿足!!

 

潮式奄仔蟹 - 可能奄仔唔係季節,我呢隻比較瘦弱. 肉質還可以,不過膏就唔香又唔甜.

 

粟米花甲浸魚鰾 - 食友細心分每碗都有齊花甲,粟米,魚鰾. 啖湯當然鮮甜. 比較意外係花甲十分肥美又鮮味,比起我係街市買好好多!!

金沙脆魚鳍 - 全場最滿意呢味. 夠創新又好食. 鹹蛋王魚鳍又脆口,肉又嫩,十分精彩!!!

正宗手打墨魚丸 - 好夠墨魚鮮味,又彈呀,又有粒粒墨魚肉,唔錯! 不過比起其他菜式就略為平凡.

龍躉三味 - 魚湯浸龍頭 - 極之鮮甜. 我地懷疑佢仲有肉一齊煲,如果唔係冇可能咁甜!!! 無論如何,呢個魚湯真係令人回味無窮.

龍躉三味 - 生炒龍躉球 - 可能魚太大,肉質比較鞋身而且欠缺彈性. 又唔知定係火路問題,總之就麻麻,有少少食柴皮感覺.

龍躉三味 - 生炆龍躉鳍 - 一大件魚肉附上厚厚魚皮,膠質十分豐富. 魚肉近骨位,所以好嫩滑,呢個好食. 不過真係太太太飽,只可以食兩件就投降!!

老闆風趣又樂意接受意見,大家都食得十分開心,有講有笑. 如果地點可以再方便一啲必定大有作為!!

地址 : 大角咀埃華街98號地下
電話 : 3620 2660

留言(6) | 引用(0) | 話題(食事)

[1]

好正呀!!! 好想去食, 請問貴唔貴? 身邊朋友好多都唔識欣賞"魚", 只好搵雙親去試下 :p


[引用] | 作者 柏金遜 | 08-Jun-09 | [舉報垃圾留言]


其實我冇睇過餐牌. 呢餐食咗$280. 不過一般我相信百多元一個人已經可以好豐富.

[引用版主回覆] | 作者 胃食妹ET | 10-Jun-09

[2]

嘩..真係樣樣都好吸引..不過個魚春凍真係好特別..

JO
[引用] | 作者 JO | 08-Jun-09 | [舉報垃圾留言]


係呀,呢個真係幾特別架!!

[引用版主回覆] | 作者 胃食妹ET | 10-Jun-09

[3]

最喜歡吃魚鱻的蕃茄肉碎魚湯飯~

如果喜歡魚湯的話, 可以一試上環禧利街新開的生記鮮魚湯米線! 我覺得他們的魚湯也很濃很鮮味呀~
http://www.openrice.com/restaurant/sr2.htm?shopid=31500

盧依喬
[引用] | 作者 盧依喬 | 08-Jun-09 | [舉報垃圾留言]


多謝推介!

[引用版主回覆] | 作者 胃食妹ET | 10-Jun-09

[4]

首先就想問吓妳...有咩秘訣食極都吾肥...

睇隻蟹個樣好靚喎...估吾到...

嘩...隻蜆好大隻呀...

魚春...好想試吓喎...

睇嚟樣樣都吾錯...我要記低先...

阿跌
[引用] | 作者 阿跌 | 08-Jun-09 | [舉報垃圾留言]


哈哈,你未見過我又點知我食極唔肥呢!!?? 其實都肥咗好多架喇,而家都要選擇吓先出飯局喇!! 佢啲魚湯都真係唔錯,可以試吓!!

[引用版主回覆] | 作者 胃食妹ET | 10-Jun-09

[5]

阿肥仔老闆真係好有心.雖然地點唔便,我也經常去光顧.


[引用] | 作者 Jason | 08-Jun-09 | [舉報垃圾留言]


只因地點唔就腳,如果唔係我一定成日去!!

[引用版主回覆] | 作者 胃食妹ET | 10-Jun-09

[6]

真係樣樣都好吸引..^^




係呀,我都食唔停口呀!!!

[引用版主回覆] | 作者 胃食妹ET | 10-Jun-09