已經絕少食自助餐嘅我,見blog友大力推介美麗華新裝修後嘅Yamm自助餐. 見佢照片十分吸引,終於忍唔住同媽咪先去試午市全自助餐只係$208. 真係估唔到食物質素十分好,環境,服務亦係一流. 刺身,壽司,爐端燒,鐵板燒,拉麵都係即叫即做. 唔係一般放係度自己攞. 生蠔亦都係即開. 甜品唔太甜連我都食到少少,生果都係件件揀手.
即叫即做刺身,有油甘魚,吞拿魚,甜蝦同北寄貝. 每款都十分新鮮,仲要靚靚上檯.
全新裝修，美輪美奐。
大堂頂嘅水晶燈好靚.
好有特式嘅擺設
麵包熱辣辣.仲有個墨魚汁包,好得意.
即叫即做日式料理
即開生蠔有irish rock同另一隻唔記得,有海水味,絕冇沖水. 風乾火腿有兩款,好味!
冷盤中最正係呢個芒果汁伴生帶子龍蝦肉. 帶子極鮮甜,配芒果汁好正!!
又靚又好食嘅海膽豆腐
溫泉蛋 - 呢個真係必食. 佢蛋黃係剛熟,但又仲係流質,口感好正!
即開生蠔,因為係即開,所以唔會開哂係度.
油甘魚好新鮮,有光澤!
有多款咖哩. 連煎三文魚都好食,仲有燒春雞,肉質好嫩.
有鮮蝦,免治雞肉軟骨,京蔥牛柳粒及白菌.
又另一盤刺身.吞拿魚同甜蝦都好好食!
有多款精美甜品.
成個蛋黃咁.....其實係芒果汁. 外面係檸檬汁之類,一個濃,一個清,好味!
芒果朱古力慕絲
芒果黑朱古力慕絲
我係從冇推介過人食自助餐,不過呢個真係值得試. 聽聞廚師係Ritz Carlton過嚟做,唔知係咪咁質素好啲呢?! 現在係試業中,五月先正式開張.
地址 : 尖沙咀彌敦道132號美麗華商場
電話 : 2315 5111
