以前住灣仔都有嚟過飲茶,搬咗過九龍後就少去. 最記得年初一拜年會去呢度飲茶,因為周圍都冇開. 今次再嚟,感覺已經唔同,可能同一大班食友一齊,都係去食餐飯咁簡單. 反而係見到一班老伙計今晚就忙忙碌碌,下個月就唔再係呢個老地方上班,對佢地嚟講感覺更強烈. 今晚我個人覺得水準唔錯,大家都食得開心. 仲同老闆影咗張相留念!! 總算係一個集體回憶.

好友請我食生日飯,但因為我晚飯時間已經差不多全滿,而好友又剛好老細外出,所以佢可以放個long lunch. 對COVA一直冇咩好感,因為佢甜品太多,完全唔合我胃口,不過見朋友食過佢新推出light lunch又即管試試. 但又一城COVA位置真係唔好,佢就係城大同又一城之間行人自動電梯底. 一到午飯時間,人來人往,完全同COVA高級格調唔配合. 食物,服務都唔錯,不過要坐係電梯底下食飯我就唔太鍾意. lunch後同事仲同我講話坐電梯去城大時到我頭頂.....@@

新出menu$88一位,但可加錢轉款.

好耐冇見好友生日,約佢食餐生日飯. 但佢又要好夜先收工,只好搵間近佢,等佢放工立即飛嚟,唔使我地等太耐. 有熟人係度打點,當然唔錯啦!! 呢度食飯的確係一個好地方. 多謝哎呀阿妹,我搭單有得食埋我嘅生日飯!! 嘻嘻!!

兩碟小食已經夠我地等人時享用

伊呂波好多朋友都去過,但偏偏我同好友都未去過. 其中一次當然係要講番我約咗靚女,但係去錯地方呢件瘀事啦!! 足足俾靚女話咗我幾年! 好彩今次無風無浪去得成! 食咗個拼盤,另加其他嘢. 都係牛舌最好食!

特上肉拼盤

本來想帶哎呀阿妹去欣葉食吓台灣菜,點知佢執咗. 上Openrice剛巧睇到素素豬呢個食評,似乎都幾地道台灣菜,咁就帶埋另一位台灣同事一齊去試試.

老闆娘係台南人,所以食品都係台南菜為主,廚師都係由台灣請返嚟. 不過份量少得誇張,而價錢又唔係平. 老闆娘見有同鄉係度招呼都幾熱情. 原來佢係香港二十幾件,做出入口生意,就係佢餐廳用嘅餐具. 所以以佢一個生意人,而家做食肆價錢貴,份量少都唔奇怪. 兩位台灣妹妹都話味道係幾正宗,不過真係少囉!!!

走時送咗兩款杯墊....只係俾兩位台灣妹囉......好似唔夠大方喎!!!

同食友講起大家都想試吓呢間私房菜,咁就搞咗呢局. 主理人係兩兄弟,所以取其名. 有趣係我同其中一個傾menu時係大家不停SMS都唔打個電話. 不過我又冇所謂,我都係SMS后嚟架!!雖然menu冇咩選擇,不過質素唔錯. 但要收$50開瓶有少少意外,但佢就檳,紅,白杯都有.

提提大家要行四層樓梯,仲要問清楚個門口係邊. 我地因為入錯門口,最終行咗夾埋有十層呀!!!! 上到去出一身汗都係一個好既運動既!!! 哈哈!!!

環境唔錯,十分幽暗,絕對適合情侶. 不過好似我地以食為主,就係影相已經好大問題,唔用閃光燈唔得,仲有時focus唔到,希望大家見諒.

好友對食冇要求,亦唔會花錢係食方面. 佢請我食生日飯,我亦錫住佢荷包,所以揀咗呢間日式放題. 竟然食物水準唔錯,超友善服務,十秒內會收走你檯上空碟. 而且餐廳空間大,夠闊落,相比松屋就差啲喇!!! 強烈推介大食積嚟食!!!

響螺片,鱆紅魚,北寄貝,魷魚,甜蝦,立魚,喜靈魚 - 每款都十分新鮮!! 仲攞咗幾片魷魚去燒,又幾好食架!!!

認識不久食友好友善請我食生日飯,而我又唔客氣去佢工作地點食飯,因為就係我最喜愛嘅四川菜館. 今次特地叫食友唔好俾我知有咩菜式,等我有驚喜! 菜式果然有驚喜,每道都十分喜歡!!! 實在好開心呀!! 多謝哂!!

胡椒豬肚雞煲 - 好特色! 有鮮花椒,夠麻. 而且豬肚燉雞要火侯,所以菜式要預訂. 湯底極之鮮甜,雞肉嫩滑,再食少少花椒粒,好有趣,又美味!

又到一年一度太興大閘蟹宴. 今次大閘蟹差不多有七襾,又大又甜,美味. 而且今次係勁多道菜,我地見到個菜單都嚇一跳. 多得食友面子,太興高層熱情為我地安排,又唔好意思推卻. 最後各人都打包,唔好嘥. 其實每道菜都做得十分好,不過今次略為偏鹹.

公蟹 - 好有氣勢!!

又一餐生日飯. 今次到facial妹妹同我食. 做完facial,最方便就當然去味一番啦. 因為食物,服務都咁好. 仲要唔收開瓶嘛!! 今次去到又見到李思捷. 我係味一番已經撞過佢三,四次. 唔單止佢,仲見到喬寶寶添. 不過喬寶寶就帶埋一班未成年濃妝艷抹少女一齊,立即印象分大減.

本來想叫刺身拼盤,不過發覺裡面有刺身係facial妹妹唔食,又有三文魚都大家唔係太好,所以最終就散叫. 有帶子,赤貝同油甘魚. 每款都極之新鮮. 有一款叫赤幹刺身真係大鄉里未食過,但咁橋賣哂,不過仲有兩件俾我地試下. 白身魚黎講都唔錯,算有甜味,都幾得意.